Семоҳаи аввали соли 2014 дар минтақаҳои озоди иқтисодӣ (МОИ)-и Тоҷикистон ба маблағи зиёда аз 9 млн. 297 ҳазор сомонӣ (беш аз 1,9 млн. $) маҳсулот истеҳсол шуд.

Бино ба маълумоти Агентии омори назди президенти ҶТ, дар ин давра дар 7 корхонаи саноатии МОИ «Суғд» дар ҳаҷми ҳудуди 9 млн. 215 ҳазор сомонӣ маҳсулот истеҳсол шудааст. Айни замон дар МОИ «Суғд» 18 субъект сабти ном шудаанд, ки 11-тоашон корхонаҳои ватанӣ ва 7-тоаш корхонаҳои муштарак мебошанд.

Дар МОИ «Данғара» соли гузашта корхонаи «Ю ва Ф сервис» ба фаъолият оғоз намуда, дар зарфи се моҳи равон ба маблағи наздики 82 ҳазор сомонӣ маҳсулот истеҳсол кард.

Тибқи маълумоти Агентии омор, дар МОИ «Панҷ» воқеъ дар ноҳияи Қумсангири вилояти Хатлон, ки дар он 6 субект ба қайд гирифта шудааст, алҳол истеҳсоли маҳсулот ба қайд гирифта нашудааст. Соли гузашта барои сохтмони иншоот дар қаламрави ин минтақа дар ҳаҷми қариб 970 ҳазор сомонӣ маблағҳои сармоягузорӣ азхуд карда шуданд.

Ҳамчунин соли гузашта барои сохтмони иншооти гуногун дар қаламрави МОИ «Ишкошим» воқеъ дар ноҳияи Ишкошими ВМКБ дар ҳаҷми беш аз 2,6 млн. сомонӣ маблағҳои сармоягузорӣ азхуд карда шуданд.

Ёдрас мекунем, ки дар Тоҷикистон 4 минтақаи озоди иқтисодӣ – «Суғд», «Данғара», «Панҷ» ва «Ишкошим» амал мекунанд.