Ширкати Beijing Jichuang Combined Gas Meter Co., Ltd. –и Чин ният дорад, ки дар шаҳри Душанбе як маҷмааи муосири баргузории намоишгоҳҳо бунёд созад.

Бино ба иттилои хадамоти матбуоти Палатаи савдо ва саноати Тоҷикистон, дар мулоқоти раиси Палата Шариф Саид бо президенти ин ширкати Чин Сен Янг Шенги масъалаҳои таҳияи тарҳи фанниву иқтисодии маҷмааи мазкур баррасӣ шуданд.

Зимни мулоқот Шариф Саид изҳор доштааст, ки сохтмони маҷмааи баргузории намоишгоҳҳо дар Душанбе бо тамоми зербинои зарурӣ ба ҷалби сармоягузориҳо ҷиҳати амалисозии лоиҳаву барномаҳои тиҷоратӣ мусоидат менамояд. «Ӯ ба ҷониби Чин тарҳи лоиҳа ва нақшаи сохтмон дар қитъа ва тадбирҳои таъмини қаламрави сохтмон бо иншооти муҳандисиву нақлиётиро пешниҳод кард», - хабар медиҳад ПСС ҶТ.

Сен Янг Шенги пешниҳод намудааст, ки барои тасмими ниҳоӣ гирифтан ба сохтмони маҷмаа созишномаи дуҷониба дар бораи ҳамкорӣ ва омӯзиши муфассали ҷанбаҳои масоили фаннии сохтмон ба имзо расонида шавад.