Рӯзи 6-уми июн дар доираи кори ҷаласаи IV-уми комиссияи байниҳукуматии Тоҷикистону Лаҳистон оид ба ҳамкории иқтисодӣ дар Душанбе ва дар чаҳорчӯби намоишгоҳ-ярмаркаи ҳамасолаи «ИНТЕРЛЕГПРОМ-2014», ки рӯзҳои 4-7-уми июн дар маҷмааи «Кохи Борбад»-и пойтахт баргузор мешавад, вохӯрии соҳибкорону тоҷирони Тоҷикистон ва Лаҳистон доир мегардад.

Бино ба иттилои хадамоти мтабуоти Паатаи савдо ва саноати Тоҷикистон (ПСС ҶТ), ҳамоиши тиҷоратии мазкур бахшида ба масъалҳои густариши минбаъдаи ҳамкориҳои тиҷоративу иқтисодӣ ва сармоягузорӣ миёни Тоҷикистону Лаҳистон аз ҷониби ПСС ҶТ бо мусоидати сафоратхонаи Лаҳистон дар Ӯзбекистон ва Тоҷикистон созмон дода мешавад.

«Ҳадаф аз баргузории ҳамоиш бо истифода аз имконоти иқтисодии Тоҷикистону Лаҳистон афзоиш додани сатҳи муомилоти молӣ тариқи рушди ҳамкориҳо миёни соҳибкорони ҳарду кишвар дар бахшҳои нақлиёт, электроэнергетика, сохтмон, кишоварзӣ, байторӣ, тандурустӣ, ҷалби сармояи Лаҳистон ба кишвар ва таъсиси корхонаҳои истеҳсолии муштарак аст», - зикр мегардад дар иттилои ПСС ҶТ.

Таъкид мешавад, ки аз лиҳози ибрози андешаву пешниҳод, лоиҳа, муомилот ва қарорҳо ҳамоиши тиҷоратӣ бояд бештар натиҷаовар буда, барои роҳандозии ҳамкории пурсамари дуҷониба ва ҷалби сармояи хориҷӣ ба иқтисоди Тоҷикистон заминаи мусоид фароҳам меоварад.