Дар зарфи 5 моҳи соли равон ҳаҷми истихроҷи ангишт дар Тоҷикистон 153,5 ҳазор тоннаро ташкил додааст, ки дар муқоиса бо ҳамин давраи соли гузашта 52 ҳазор тонна зиёдтар аст.

Тавре ба «Азия-Плюс» аз Вазорати саноат ва технологияҳои нави ҷумҳурӣ хабар доданд, ҳиссаи асосии ангишти истихроҷшуда дар Маркази барқу гармидиҳии Душанбе-2 истифода мешавад, ки дар 5 моҳ ба ин марказ 29,3 ҳазор тонна ангишт интиқол шудааст. Дар ин давра Ширкати алюминии тоҷик (ТАЛКО) – 26 ҳазор тонна ва корхонаи «Тоҷиксемент» - 16,1 ҳазор тонна ангишт гирифтаанд.

«Сол то сол Тоҷикистон ҳаҷми воридоти ангиштро тадриҷан коҳиш медиҳад. Масалан, аз оғози сол ҳаҷми воридоти ангишт ба кишвар ҳамагӣ 839 тоннаро ташкил дод ва ин ҳам дар ҳолест, ки дар ҳамин давраи соли гузашта ин нишондиҳанда ба 1,4 ҳазор тонна ва соли 2012 ба 5,7 ҳазор тонна баробар буд. Агар корхонаҳо ба пардохти маблағ омода бошанд, метавон аз воридот комилан даст кашид. Имзои шартнома, пешпардохт ва кор кардан зарур аст», - гуфтанд дар вазорат.

Дар Вазорат зикр карданд, ки корхонаҳои истихроҷи ангишти кишвар ба ивази 3,5 ҳазор тоннаи имрӯза истихроҷи шабонарӯзии ангиштро то ба 10 ҳазор тонна расонида метавонанд. «Дар Тоҷикистон арзиши 1 тонна ангишт дар конҳои кушод (карьер) аз 80 то 200 сомонӣ ва истихроҷшуда аз конҳо (шахтаҳо) ҳудуди 450 сомониро ташкил медиҳад», - гуфт манбаъ.

Зимнан зикр гардид, ки дар Тоҷикистон дар маҷмӯъ дар 14 кон 18 корхонаи истихроҷи ангишт фаъолият доранд. Соли 2013 ҳаҷми истихроҷи ангишт дар Тоҷикистон 518 ҳазор тоннаро ташкл дод, ки 86% аз ин миқдорро корхонаҳои давлати истихроҷи ангишт таъмин намуданд.

Корхонаи бузургтарини истихроҷи ангишти ҷумҳурӣ корхонаи давлатии «Кони Фон Яғноб» мебошад, ки дар зарфи 5 моҳи соли ҷорӣ дар он 121,6 ҳазор тонна ангишт (80% аз ҳаҷми умумӣ) истихроҷ шудааст. Барои рушди ин соҳа КВД «Ангишти тоҷик» таъсис дода шуда, барои саривақт таъмин намудани эҳтиёҷои ҷумҳурӣ ба ангишт, нақшаи чорабиниҳо таҳия гардидааст.