Дар муқоиса бо соли гузашта моҳи июли соли ҷорӣ истгоҳҳои тобеъ ба ширкати «Барқи тоҷик» ҳаҷми истеҳсоли нерӯи барқро ба миқдори 23 млн. кВт/соат кам карданд.

Бино ба маълумоти Маркази мониторинг ва огоҳкуни пешакии Вазорати рушди иқтисод ва савдои ҶТ,  сабаби чунин вазъ коҳиши талаботи Ширкати алюминии тоҷик (ТАЛКО) ба нерӯи барқ мебошад.

Ба иттилои манбаъ, моҳи гузашта ҳаҷми умумии истеҳсоли барқ дар кишвар 1 млрд. 552 млн. кВт/соат ё худ ба ҳисоби миёна 50,1 млн. кВт/соат дар як шабонарӯзро ташкил додааст.

Зимнан зикр мегардад, ки моҳи июли соли равон ҳаҷми умумии истеъмоли нерӯи барқ дар саросари кишвар ба 1 млрд. 338 млн. кВт/соат расидааст, ки нисбат ба моҳи июли соли 2013 ба миқдори 79 млн. кВт/соат камтар аст.

«Моҳи июли соли ҷорӣ аз нерӯгоҳҳои «Сангтӯда-1» ва «Сангтӯда-2» тариқи шабакаҳои 220 кВ ва 110 кВ ба Афғонистон 168,4 млн. кВт/соат нерӯи барқ интиқол дода шуд, ки нисбат ба ҳамин давраи соли пешин 14,8 млн. кВт/соат зиёдтар буда, аз ҳаҷми умумии истеҳсоли барқ дар Тоҷикистон ҳудуди 11%-ро ташкил медиҳад», - омадааст дар маълумоти марказ.