Дар Маҷмааи давлатии «Кохи Борбад»-и шаҳри Душанбе имрӯз намоишгоҳ-ярмаркаи молҳои содиротии «Музофотии Синтзян-Уйғури Чин – Тоҷикистон 2014» ба кор шурӯъ намуд.

Намоиши молу маҳсулоти содиротии ширкатҳои Чин то 21-уми сентябр идома ёфта, сокинон молу маҳсулоти пешниҳодшударо дастрас карда метавонанд.

Дар намоишгоҳ-ярмаркаи мазкур молу маҳсулоти беш аз 60 ширкати пешрафтаи Чин дар  бахшҳои саноати сабук, сохтмон ва кишоварзӣ, IT-технология, комплекси агросаноатӣ ва ғайра ба маърази тамошову дастрасӣ гузошта мешавад.

Зимни суханронӣ дар маросими ифтитоҳ раиси Палатаи савдо ва саноати Тоҷикистон Шариф Саид қайд кард, ки чунин чорабиниҳо ба хотири таҳким ва рушди минбаъдаи робитаҳои тиҷоративу иқтисодии Тоҷикистону Чин, ҷалби сармояи Чин ба иқтисоди ҷумҳурӣ, мусоидат ба таъсиси корхонаҳои муштарак дар Тоҷикистон созмон дода мешаванд.