Дар толори конфронси бинои Ассотсиатсияи ташкилотҳои маблағгузори хурди Тоҷикистон (АТМХТ) дар шаҳри Душанбе дар чорчӯбаи лоиҳаи «Рушди сектори коркарди меваю сабзавот дар Қирғизистон ва Тоҷикистон» cессияи 2-ми тренингҳои бехатарии хӯроквории НАССР (Hazard Analysis and Critical Control Points – таҳлили хавф ва нуктаҳои қатъии назорат) ва маркетинг ( 22-24-уми сентябр) ҷараён дорад.

Бино ба иттилои намояндагии Иттиҳоди Аврупо дар ҶТ, чорабинии мазкур аз тарафи Ассотсиатсияи миллии соҳибкории хурду миёнаи Тоҷикистон дар якҷоягӣ бо ташкилоти ғайридавлатии British Expertise (Британияи Кабир) ва бо дастгирии молиявии Иттиҳоди Аврупо дар чорчӯбаи барномаи Осиёи Миёна – Инвест III баргузор мегардад.

Гуфта мешавад, ин лоиҳа барои рушди корхонаҳои хурду миёнаи Тоҷикистону Қирғизистон, ки барои коркарди меваю сабзавот ҷалб шудаанд, равона гардида, дар чорчӯбаи ин лоиҳа барои тренерҳо (омӯзгорон) тренингҳои серӯза дар муддати соли ҷорӣ ва оянда гузаронида мешаванд.

Зимнан зикр гардид, ки дар тренинг кормандони масъули сохторҳои давлатӣ, намояндагони сектори хусусӣ, коршиносон, намояндагони мактабҳои олӣ, ва роҳбарони ассосиатсияҳои соҳибкории манфиатдор ширкат меварзанд.