Аз оғози сол дар Тоҷикистон беш аз 610 ҳазор тонна ангишт истихроҷ шуд, ки нисбат ба ҳамин давраи соли гузашта 273 ҳазор тонна ё худ тақрибан 80% зиёдтар аст.

Тавре аз хадамоти матбуоти Вазорати саноат ва технологияҳои нави ҶТ хабар доданд, аз ҳаҷми умумии ангишти истихроҷшуда 80%-аш ба корхонаҳои саноатӣ рост омада, тайи моҳҳои ахир ангиштканон истихроҷи шабонарӯзии онро то 4,5 ҳазор тонна расонидаанд.

«Айни замон дар анборҳои корхонаҳои саноатӣ ва нуқтаҳои фурӯш барои аҳолӣ ҳудуди 70 ҳазор тонна ангишт захира шудааст», - гуфтанд дар вазорат.

Бино ба маълумоти Вазорат, феълан зиёда аз 160 корхонаҳои саноатии кишвар ба сифати сӯзишворӣ аз ангишт истифода мекунанд.

Ёдрас мекунем, ки дар муқоиса бо соли 2012 соли гузашта истихроҷи ангишт дар Тоҷикистон 25% афзуда, ба 518 ҳазор тонна расид. Ҳаҷми ангишти фурӯхташуда ба истеъмолгарон бошад, аз 424 ҳазор то ба 482 ҳазор тонна расид.