Зимни мулоқоти президенти Тоҷикистон Эмомалӣ Раҳмон бо раиси Шӯрои мудирони ширкати роҳҳои оҳани Чин Чжан Зунян дар Пекин масоили вобаста ба сохтмони қитъаи Ваҳдат-Ёвони роҳи оҳани Душанбе-Қӯрғонтеппа ва дигар масоили мавриди таваҷҷуҳ баррасӣ шуд.

Бино ба иттилои хадамоти матбуоти сарвари давлат, доир ба тезондан ва бо сифати баланд анҷом додани татбиқи ин лоиҳа гуфтугӯйи судманд сурат гирифт.

Тавре зикр гардид, сохтмони ин роҳи оҳан бо нақбҳо ва пулҳояш бояд то соли 2016 анҷом дода шавад. Дарози ин қитъаи роҳи оҳан 40,7 км буда, иборат аз 3 нақб бо дарозии умумии 3755 м ва 5 пул бо дарозии умумии 712 м мебошад.

Ҷойи зикр аст, ки қисмати зиёди корҳои сохтмонӣ аз ҷониби мутахассисону коргарони тоҷик иҷро карда мешавад.

Ҳамчунин доир ба ҳамкорӣ дар татбиқи дигар лоиҳаҳои судбахш низ гуфтугӯйи судманд ва табодули назар сурат гирифт.