Корхонаҳои истихроҷи ангишти Тоҷикистон нақшаи солонаи пешбинишудаи истеҳсоли 700 ҳазор тонна ангиштро пеш аз муҳлат ба иҷро расониданд.

Тавре аз Вазорати саноат ва технологияҳои нави ҶТ хабар доданд, ба санаи 7-уми ноябр дар ҷумҳурӣ беш аз 710 ҳазор тонна ангишт истихроҷ шудааст, ки нисбат ба ҳамин давраи соли гузашта 262 ҳазор тонна зиёдтар мебошад.

Ба итттилои манбаъ, ҳаҷми ангишти фурӯхташуда 678 ҳазор тоннаро ташкил додааст, ки дар муқоиса бо ҳамин давраи соли гузашта 300 ҳазор тонна бештар аст.

«Харидорони асосии ангишт корхонаҳои саноатӣ ва бахши энергетика мебошанд, ки аз ҳаҷми умумии ангишти фурӯхташуда 82%-аш ба ҳиссаи онҳо рост меояд. Аз ҷумла маркази барқи гармидиҳии Душанбе зиёда аз 184 ҳазор тонна ангишт харид», - гуфт манбаъ.

Зимнан зикр гардид, ки айни замон захираи ангишти хушсифат дар анборҳои корхонаҳо ва нуқтаҳои фурӯш беш аз 56 ҳазор тоннаро ташкил медиҳад.

Бино ба маълумоти Вазорат, феълан зиёда аз 160 корхонаҳои саноатии кишвар ба сифати сӯзишворӣ аз ангишт истифода мекунанд.

Ёдрас мекунем, ки дар муқоиса бо соли 2012 соли гузашта истихроҷи ангишт дар Тоҷикистон 25% афзуда, ба 518 ҳазор тонна расид. Ҳаҷми ангишти фурӯхташуда ба истеъмолгарон бошад, аз 424 ҳазор то ба 482 ҳазор тонна расид.