Аз 16-уми ноябр реҷаи маҳдуди истифодаи нерӯи барқ дар шаҳрҳои вилояти Суғд низ ҷорӣ шуд. Дар ин бора ба «Азия-Плюс» директори муассисаи шабакаҳои барқи вилояти Суғд Муъминҷон Муҳаммадзода хабар дод.

Ёдрас мекунем, ки аз 1-уми октябри соли равон дар тамоми ноҳияҳои минтақаи шимоли кишвар реҷаи маҳдуди истифода барқ ҷорӣ гардида, акнун он ба шаҳрҳои вилоят низ дахл кард.

Бино ба гуфти манбаъ, минбаъд рӯзона ба шаҳрҳо муддати 5 соат ва шабона низ аз соати 00-00 то 05-00-и субҳ интиқоли барқ қатъ мегардад, яъне акнун шаҳрнишинони вилоят дар як шабонарӯз 14 соат бо нерӯи барқ таъмин карда мешаванд.

«Лимити ҷудошуда барои вилояти Суғд 7 млн. 500 кВт/соат дар як шабонарӯзро ташкил медиҳад, талаботи воқеъии истеъмолгарон бошад, бидуни реҷаи маҳдуд, ба 14 млн. 500 кВт/соат баробар аст», - гуфт манбаъ.

Зимнан зикр гардид, ки реҷаи маҳдуди истифодаи барқ танҳо нисбати корхонаҳои саноатӣ ва иншооти ҳаётан муҳими вилоят истифода намешавад.