Муовини аввали нахуствазири Тоҷикистон Давлаталӣ Саид, вазирони энергетикаи Қирғизистон, Афғонистон ва Покистон чанде қабл аз рӯйи натиҷаҳои ҷаласаи шӯрои байниҳукуматӣ оид ба энергетика дар Истамбул созишнома дар бораи амалисозии Лоиҳаи интиқол ва савдои нерӯи барқ дар Осиёи Марказӣ ва Ҷанубӣ (CASA-100)-ро ба имзо расониданд. Дар ин бора ба «Азия-Плюс» сармушовири хадамоти матбуоти президенти Тоҷикистон Субҳиддин Муҳиддинов хабар дод.

Лоиҳаи CASA-1000, ки интиқоли нерӯи барқ аз Тоҷикистону Қирғизистон ба Афғонистону Покистонро дар мавсими тобистон таъмин мекунад, ахири соли 2018 бо дастгирии молиявии Бонки ҷаҳонӣ амалӣ мешавад.

Мутобиқи лоиҳа, интиқоли 70%-и нерӯи барқ ба Тоҷикистон ва 30%-и он ба Қирғизистон рост меояд.

Барои амалисозии лоиҳаи мазкур Бонки ҷаҳонӣ 526,5 млн. доллари ИМА ҷудо намуд, ки аз ин миқдор ба сифати бурс ба Тоҷикистону – 45 млн. $, Қирғизистон – 45 млн. $ ва ба сифати қарз ба Афғонистон – 316,5 млн. $ ва Покистон – 120 млн. $ ихтисос дода шуд.

Қобили зикр аст, ки дар доираи Лоиҳаи интиқол ва савдои нерӯи барқ дар Осиёи Марказӣ ва Ҷанубӣ (CASA-100) Тоҷикистону Қирғизистон уҳдадор мешаванд, ки муддати 15 сол дар мавсими тобистон (аз моҳи май то сентябр) ба Покистон дар ҳаҷми 1000 МВт ва ба Афғонистон 300 МВт нерӯи барқ интиқол диҳанд, ки дар панҷ моҳ 5 млрд. кВт/соатро ташкил медиҳад. Аз ин ҳаҷм интиқоли 2 млрд. кВт/соат ба дӯши Қирғизистон ва 3 млрд кВт/соат нерӯи барқ ба дӯши Тоҷикистон вогузор мегардад.

Арзиши умумии лоиҳаи CASA-1000 1 млрд. доллари ИМА арзёбӣ шуда, масофаи хатҳои интиқоли барқ тибқи лоиҳа 750 километрро ташкил медиҳад.