Дар зарфи 11 моҳи соли равон ба Тоҷикистон қариб 205 ҳазор тонна гази моеъ ворид шуд.

Бино ба маълумоти Вазорати рушди иқтисод ва савдои ҶТ, дар муқоиса бо ҳамин давраи соли гузашта ин нишондиҳанда 12,6 ҳазор тонна зиёдтар аст.

Гуфта мешавад, моҳи ноябр ҳаҷми воридоти гази моеъ ба Тоҷикистон 18,1 ҳазор тоннаро ташкил додааст, ки нисбат ба моҳи ноябри соли гузашта 36 тонна камтар мебошад.

Қобили зикр аст, ки ин навъи сӯзишвориро Тоҷикистон асоаан аз Қазоқистон ва ҳамчунин аз Русияву Туркманистон низ ворид мекунад. Соли 2013 ба ҷумҳурӣ дар маҷмӯъ ҳудуди 214 ҳазор тонна гази моеъ ворид гардида буд.

Тибқи маълумоти Вазорати рушди иқтисод ва савдо, айни замон беш аз 49%-и нақлиёти автомобилии кишвар бинобар сабаби гаронии бензин, ба сифати сӯзишворӣ аз гази моеъ истифода мекунанд.

Дар ҳамин ҳол, арзиши ин навъи сӯзишворӣ дар нуқтаҳои фурӯши пойтахт тақрибан ба миқдори 30%, аз 2,9 - 3 сомонӣ то ба 3,8 - 4 сомонӣ барои як литр боло рафт.