Бақияи пасандозҳо дар интиҳои моҳи ноябри соли ҷорӣ нисбат ба ҳамин давраи соли қаблӣ 19,5 фоиз афзуда, ба 6 млрд. 555 млн. сомонӣ баробар шуд.

Бино ба иттилои хадамоти матбуоти Бонки милии ҷумҳурӣ, дар таркиби бақияи пасандозҳо дар ин давра ҷалби маблағҳои шахсони воқеӣ нисбат ба шахсони ҳуқуқӣ бештар гардидааст, аз ҷумла, 36,0 фоиз ё 2 млрд.360,3 млн. сомониро пасандозҳои шахсони ҳуқуқӣ ва 64,0 фоиз ё 4млрд.194,8 млн. сомониро пасандозҳои шахсони воқеӣ ташкил додаанд.

Ба иттилои манбаъ, фоизҳои миёнавазни пасандозҳо дар ин давра бо пули миллӣ 15,15 фоиз ва бо асъори хориҷӣ 11,98 фоизи солонаро ташкил намуд, ки назар ба ҳамин давраи соли гузашта мутаносибан 0,68 фоиз паст ва 0,36 фоиз баланд мебошанд.

Қобили зикр аст, ки айни замон дар Тоҷикистон  141 адад ташкилотҳои қарзӣ, аз ҷумла 17 бонк, 1 ташкилоти қарзии ғайрибонкӣ, 41 ташкилоти амонатии қарзии хурд, 43 ташкилоти қарзии хурд ва 39 фонди қарзии хурд фаъолият доранд.