Палатаи поёнии парлумон имрӯз созишномаи ҳанӯз тобистони соли гузашта баимзорасида миёни ҳукумати ҶТ ва ҶДММ «Ширкати саноати кӯҳкории Тоҷикистону Чин» дар бораи коркарди комплексии захираҳои кони «Зарнисори Шимолӣ»-ро тасдиқ кард.

Зимни шарҳи ин масъала ба вакилон муовини аввали раиси Кумитаи давлатии амволи ҷумҳурӣ Лочин Файзуллозода изҳор намуд, ки барои амалисозии лоиҳаи мазкур Чин 200 млн. доллари ИМА маблағ ҷудо мекунад.

«Тибқи лоиҳа сохтмони шаҳраки нави саноатӣ дар наздикии шаҳри Зарнисори вилояти Суғд пешбинӣ шудааст, ки дар он корхонаҳои истеҳсоли маъдан ва сурб бунёд гардида, беш аз 2 ҳазор нафар шаҳрвандони кишвар бо ҷойи кори доимӣ таъмин карда мешаванд», - иброз дошт Л.Файзуллозода.

Ба гуфтаи ӯ, ашёи хом барои ин корхонаҳо аз ноҳияи Мастчоҳ истихроҷ карда мешавад. «Дар ин корхонаҳо солона зиёда аз 2 млн. тонна маъдан ва 20 ҳазор тонна сурб истеҳсол хоҳад шуд», - афзуд номбурда.