Дар канори маркази маъмурии ноҳияи Ховалинги вилояти Хатлон нахустин корхона дар ин минтақаи кӯҳӣ оид ба истеҳсоли масолеҳи сохтмони инертӣ бо иқтидори истеҳсолии то 200 тонна шағал (сангреза) ва рег дар як сол мавриди истифода қарор гирифт.

Дар маросими ифтитоҳи корхона қайд карда шуд, ки ин корхона аз ҷониби соҳибкори маҳаллӣ Хайрулло Одинаев бунёд гардида, ӯ ба маблағи беш аз 2 млн. сомонӣ аз бонк қарз гирифта, барои ин корхона таҷҳизоти истеҳсоли Эрон харидааст.

Соҳибкор Х.Одинаев дар ин робита изҳор намуд, ки аллакай рӯзҳои аввали фаъолияти корхона дурусту саривақтӣ будани сохтмони онро собит сохтанд, зеро то ин замон аҳолии маҳаллӣ барои эҳтиёҷоти хоҷагидорӣ бо пардохти 1300 сомонӣ як автомашина шағалу регро аз Кӯлоб меоварданд ва акнун ҳамин як автомашина шағалро метавонанд бо ҳамагӣ 400 сомонӣ дастрас намоянд.

Ба гуфтаи соҳибкор, имрӯз дар корхона 10 нафар ба таври доимӣ фаъолият дошта, тадриҷан шумори онҳо зиёд хоҳад шуд.