Тоҷикистон масъалаи узвият ба Иттиҳоди иқтисодии Авруосиё (ИИАО)-ро меомӯзад.

Муовини директори Маркази тадқиқоти стратегии назди президенти Тоҷикистон Фарида Муъминова зимни нишасти хабарии имрӯза дар ин робита изҳор намуд, ки дар назди Вазорати рушди иқтисод ва савдои ҷумҳурӣ гурӯҳи корие амал мекунад, ки ин масъаларо таҳлилу баррасӣ дорад.

«Ҳисобу китоби хеле коршиносона зарур аст, то ки миёни сиёсату иқтисод қарори мутавозин қабул шавад», - гуфт Муъминова.

Ӯ як қатор афзалиятҳои сершумор дар баробари «баъзе маҳдудиятҳо»-и узвияти Тоҷикистон ба ин Иттиҳодро номбар кард.

Аз ҷумла ӯ қайд кард, ки барои Тоҷикистон масъалаи шуғли аҳолӣ хеле муҳим буда, бозорҳои кишвар бо бозорҳои меҳнати Қазоқистону Русия ҳамгиро мебошанд ва шумори муҳоҷирони Тоҷикистон хеле зиёд аст.

Дар ҳамин ҳол, Ф.Муъминова бар ин назар аст, ки ҳамгиройӣ ба ИИАО дарҳо барои ҳамкорӣ бо кишварҳои дигар, ба гунаи мисол бо Чину Ҳиндустон ва Покистонро намебандад. «Тавозуни ин манфиатҳои кишвар хеле муҳим аст», - афзуд номбурда.