Нимсолаи аввали соли ҷорӣ ҳаҷми муомилоти моли хориҷии Тоҷикистон каме бештар аз 2,5 млрд. доллари ИМА-ро ташкил дод, ки дар муқоиса бо ҳамин давраи соли гузашта ба андозаи 21,9% ё худ 563,4 млн. доллари ИМА камтар аст.

Сардори Хадамоти гумруки назди ҳукумати ҶТ Абдуфаттоҳи Ғоиб зимни нишасти хабарии имрӯза дар ин робита иттилоъ дод, ки дар ҳаҷми умумии муомилоти моли хориҷии кишвар дар соли равон зиёда аз 1,5 млрд. доллари ИМА ба воридот ва 430,3 млн. доллари ИМА ба содироти маҳсулот рост меояд.

Роҳбари Хадамоти гумрук қайд кард, ки нисбат ба моҳҳои январ-июни соли 2014 тайи 6 моҳи соли равон ҳаҷми воридоти маҳсулот ба миқдори 25,1% ё худ 526 млн. доллари ИМА ва содирот ба андозаи 7,9% ё худ 36,9 млн. доллари ИМА камтар шудааст.

Ба гуфтаи ӯ, соли ҷорӣ маҳсулот аз Тоҷикистон асосан ба Туркия (27,8% аз ҳаҷми умумии содирот), Швейтсария (21,5%), Қазоқистон (18,5%), Эрон (7,1%), Русия (6,6%), Афғонистон (4,2%) ва Покистон (3,2%) содирот шудааст.

Зимнан зикр гардид, ки дар ин давра ба Тоҷикистон маҳсулот ба миқдори нисбатан бештар аз Русия (31,6% аз ҳаҷми умумии воридот), Чин (17,1%) ва Қазоқистон (16,8%) ворид карда шудааст.