Президенти Тоҷикистон Эмомалӣ Раҳмон  мутмаин аст, ки пешрафту тараққиёти минбаъдаи ҳамаи соҳаҳои ҳаёти кишвар ба бунёди иншооти хурду бузурги гидроэнергетикӣ ва дар навбати аввал нерӯгоҳи Роғун вобаста аст.

«Маҳз бо дарназардошти ҳамин воқеият мо сохтмони нерӯгоҳи Роғунро масъалаи ҳаёту мамоти Тоҷикистон эълон намудем», - гуфт сарвари давлат зимни суханронӣ дар мулоқот бо роҳбарону фаъолон ва сокинони шаҳри Роғун.

Президенти мамлакат таъкид дошт, ки имрӯзҳо дар доираи дастгириҳои доимии давлату ҳукумати мамлакат ва азму талоши мутахассисони ватанӣ бунёди бузургтарин иншооти шаҳр - нерӯгоҳи барқи обии Роғун босуръат идома дорад.

«Аксари сокинони мамлакат хуб дар хотир доранд, ки ман ҳанӯз рӯзҳои аввали роҳбариам бо вуҷуди вазъи ноороми кишвар ва идома доштани мухолифатҳои мусаллаҳона таъмини амният ва истиқлолияти энергетикии Тоҷикистонро ҳамчун яке аз ҳадафҳои стратегии Ҳукумат эълон карда будам, - гуфт президент. -  Албатта, дар он солҳои ноорому вазнин захираҳои молиявӣ ва имкониятҳои моддиву техникии ба анҷом расонидани вазифаҳои дар самти бунёди иншооти энергетикӣ муайяншуда вуҷуд надоштанд, вале бо вуҷуди ин, аз ҷониби мутахассисон нақшаи татбиқи онҳо барои ояндаи наздик омода карда мешуданд».

Эмомалӣ Раҳмон ҳамчунин зикр кард, ки «иқдоми мазкур тадриҷан эътимоди мардуми кишварро ба ояндаи соҳаи энергетикаи мамлакат ва рушди устувору бемайлони иқтисодиву иҷтимоии кишвар тақвият бахшид».