Зимни нишасти хабарии имрӯза раиси Кумитаи ҷавонон, варзиш ва сайёҳии назди ҳукумати ҶТ Аҳтам Абдуллозода иттилоъ дод, ки нимсолаи аввали соли ҷорӣ 147 ҳазору 265 нафар сайёҳони хориҷӣ аз Тоҷикистон боздид кардаанд.

Ба гуфтаи ӯ, мутобиқи маълумоти коршиносони байнулмилалӣ, ҳар кадоме аз сайёҳон зимни боздид аз Тоҷикистон ба ҳисоби миёна 500 доллари ИМА маблағ харҷ мекунад.

«Бо назардошти ин хароҷот, ба сурати умум метавон гуфт, ки семоҳаи дуюми соли равон 74 ҳазор нафар сайёҳон ба Тоҷикистон ташриф оварда, бахши сайёҳӣ ба ҳисоби миёна ба иқтисоди кишвар зиёда аз 73 млн. доллари ИМА маблағ ҷалб намуд», - гуфт ӯ.

Бино ба гуфтаи Абдуллозода, бештари сайёҳон ба Тоҷикистон аз Қирғизистон, Ӯзбекистон, Афғонистон, Русия, ИМА, Чин, Туркия, Арманистон, Кореяи Ҷанубӣ ва дигар кишварҳо меоянд.