Дар муқоиса бо нимсолаи аввали соли 2014 тӯли 6 моҳи соли равон ҳаҷми боркашонӣ тариқи роҳи оҳан дар КВД «Роҳи оҳани Тоҷикистон» тақрибан 12% кам шуд.

Муовини аввали сардори Идораи роҳи оҳани Тоҷикистон Баҳром Шодиев зимни нишасти хабарии имрӯза дар ин робита иттилоъ дод, ки нимсолаи аввали соли ҷорӣ ҳаҷми боркашонӣ беш аз 2,8 млн. тоннаро ташкил додааст, ки нисбат ба ҳамин давраи соли гузашта 364 ҳазор тонна камтар аст.

«Аз ҷумла, ҳаҷми ҳамлу нақли транзитӣ ба андозаи 33,6% - аз 731 ҳазор тонна дар моҳҳои январ-июни соли 2014 то ба 486 ҳазор тонна дар ҳамин давраи соли равон коҳиш ёфт», - иброз дошт муовини аввали сардори корхона.

Ба гуфтаи ӯ, шумори мусофироне, ки дар ин давра аз хизматгузориҳои Идораи роҳи оҳани Тоҷикистон истифода кардаанд, ба миқдори 5% кам шуда, нимсолаи аввали соли ҷорӣ ба 198 ҳазор мусофирон хизмат расонида шудааст, ки нисбат ба ҳамин давраи соли гузашта 10 ҳазор нафар мусофир камтар аст.

Номбурда қайд кард, ки айни замон тариқи хатсайрҳои Душанбе - Маскав (3 маротиба дар як ҳафта) ва Хуҷанд - Маскав (1 маротиба дар як ҳафта) қатораҳои мусофирбар ҳаракат мекунанд. «Дар робита ба нокофӣ будани мусофирон, ҳаракати қатораҳо тавассути хатсайри Душанбе - Конибодом мутаваққиф шуд. Қатораи мусофирбари Душанбе - Пахтаобод ҳамарӯза равуо дорад», - афзуд муовини аввали сардори корхона.

Қобили зикр аст, ки айни замон парки Идораи роҳи оҳани Тоҷикистон аз 2 ҳазору 72 адад вагонҳои боркаш ва 441 адад вагонҳои мусофирбар ва ҳамчунин 56 тепловоз иборат аст.