- Дар ҷараёни аломатгузорӣ ва таъйини марз Тоҷикистон 14 чоҳи истихроҷи газро ба ихтиёри Қирғизистон гузошт, - иттилоъ додааст ба ВАО рӯзи 21 июл муовини директори Агентиии давлатии геология ва захираҳои минералии Қирғизистон Уланбек Рисқулов.

Ба гуфтаи ӯ, дар ҷараёни корҳои аломатгузорӣ ва таъйини марз бо Тоҷикистон чоҳҳои истихроҷи газ, ки дар қаламрави Қирғизистон қарор доштанду аз ҷониби ширкатҳои Тоҷикистон истифода мешуданд, ба молиякияти ҳукумати Қирғизистон гузаштаанд.

«Нахуст мо гумон доштем, ин гуна чоҳҳо 8-то аст, вале чун ба маҳал омадем, маълум шуд, ки он ҷо 14-то чунин чоҳ мавҷуд аст. Ҳамаи ин чоҳҳо дар замони шӯравӣ коркард шуда, маълум гардид, ки аксари онҳо корношояманд, вале 1 чоҳ амалкунанда ва 2 чоҳи дигар ба кор омода буда, 1-тои дигараш дар ҳоли барқароршавӣ аст», - гуфтааст Рисқулов.

Муовини директори Агентӣ дар шарҳи ин маълумот изҳор доштааст, ки айни замон масъалаи ба тавозуни Фонди идоракунии амволи давлатӣ гузаронида шудани чоҳҳо мавриди ҳаллу фасл қарор дошта, минбаъд чоҳҳо ба ихтиёри ҶСК «Қирғизнафтугаз» супурда мешаванд, ки дар қаламрави гирду атрофи онҳо соҳиби иҷозатнома аст.

«Паҳлӯи онҳо чоҳҳои ҶСК «Қирғизнафтугаз» ҷойгир шуда, лӯлаи газ дар ин минтақаи наздимарзӣ ҳанӯз замони шӯрави кашида шудааст.Маҳаллаҳои аҳолинишини Мақсад ва Аркаи ноҳияи Лайлаки вилояти Бодканд низ ба онҳо наздик аст», - афзудааст мансабдори қирғиз.