Корҳои бозсозӣ дар нақби «Истиқлол» моҳи октябри соли равон ба итмом мерасанд.

Муовини аввали вазири нақлиёти Тоҷикистон Суҳроб Мирзоев зимни нишасти хабарии имрӯза дар ин робита изҳор намуд, ки айни замон ширкати эронии «Собир» ба корҳои марбут ба низоми заҳбур (дренаж)-и нақб машғул буда, шабонарӯзӣ дохили нақб 150 метр бетонрезӣ мешавад.

Суҳроб Мирзоев қайд кард, ки то имрӯз аз 10 ҳазор метри пешбинишуда қариб 3,7 ҳазор метр дохили нақб бетонрезӣ шудааст. «Корҳои бузургмиқёси бозсозӣ дар нақб 23 июни соли ҷорӣ оғоз гардида, дар ин робита ҳаракати нақлиёт тавассути нақб маҳдуд шуд», - гуфт ӯ.

Ба гуфтаи Мирзоев, рӯзҳои назди миёни идораҳои нақлиёти Тоҷикистону Эрон бояд оид ба оғози корҳои ҳавософкунии нақби «Истиқлол» қарордод ба имзо расад.

Кобили зикр аст, ки рӯзи 7 июли соли равон   дар Теҳрон байни Ҳукумати Ҷумҳурии Тоҷикистон ва Ҳукумати Ҷумҳурии Исломии Эрон Ёддошти тафоҳуми ҳамкорӣ оид ба идомаи бозсозии нақби Истиқлол дар Тоҷикистон ба имзо расид.

Ёдрас мекунем, ки бинобар сабаби оғози корҳои бозсозӣ дар нақби «Истиқлол», шурӯъ аз 22 июн ҳаракати нақлиёт тариқи роҳи мошингарди Душанбе - Хуҷанд маҳдуд карда шуда,  аз 22 июн то 31 октябр равуои нақлиёт дар қитъаи мазкур аз соати 6-и субҳ то 22-и шаб тавассути ағбаи Анзоб сурат мегирад. Аз 22 июн то 31 октябр ба ҳаракати нақлиёт тавассути нақби «Истиқлол» аз соати 22-и шаб  то 6-и субҳ иҷозат дода мешавад.

Қобили зикр аст, ки соли 2003 Тоҷикистону Эрон дар бораи идомаи сохтмони нақби «Истиқлол» созишнома ба имзо расонида, ҳаҷми маблағгузорӣ 39 млн. доллари ИМА-ро ташкил дод. Аз ин миқдор 10 млн. $ маблағгузории бурсии ҳукумати Эрон, 7,8 млн. $ - ҳиссаи ҳукумати Тоҷикистон ва 21,2 млн. $ - қарзи ҷониби Эрон буд. Ҳарчанд маросими ба истифода додани он ҳанӯз соли 2006 доир гардида бошад ҳам, сохтмони он то ҳанӯз идома дорад.

Моҳи апрели соли гузашта ширкати эронии «Собир» корҳои бозсозии нақби «Истиқлол»-ро дубора барқарор кард.

Қаблан ҳукуматҳои Тоҷикистону Эрон ба мувофиқа расида буданд, ки барои комилан ба анҷом расидани сохтмони нақб дар ҳаҷми 6 млн. $ иловатан маблағгузорӣ мекунанд. Ҷонибҳо уҳдадор шуда буданд, ки барои иҷрои корҳои боқимонда дар нақб ҳар кадоме 3 млн. $ маблағ ҷудо мекунанд.

Ҳамчунин мавриди зикр аст, ки аввали моҳи июни соли равон президенти Тоҷикистон Эмомалӣ Раҳмон зимни суҳбат бо вазири кишвари Эрон Абдурризо Раҳмонии Фазлӣ  изҳор дошта буд,  ки барои татбиқи амалии санадҳои имзошуда ҷаҳди бештар бояд кард.

Нақби «Истиқлол» дар 90 километрии шимоли Душанбе, дар роҳи мошингарди Душанбе - Хуҷанд воқеъ буда, аз зери ағбаи баландкӯҳи Анзоб мегузарад. Масофаи нақби «Истиқлол» 5,2 километрро ташкил медиҳад.