Бонки миллии Тоҷикистон барои густариш додани муносибатҳои дуҷонибаи судманди байналхалқӣ бо ташкилотҳои бонуфузи молиявии ҷаҳон ҳамкориҳои зичро ба роҳ монда, ҷиҳати рушду нумуи иқтисоди миллӣ ва низоми бонкии кишвар ҷидду ҷаҳд менамояд. Мулоқоте, ки рӯзи 27 августи соли ҷорӣ муовини Раиси Бонки миллии Тоҷикистон Умед Латифов бо Мушовири калони Бонки осиёгии рушд (БОР) Осиё Саид Заиданшоҳ анҷом дод, аз ҷумлаи ҳамин чорабиниҳои бонк ба шумор меравад.

Бино ба иттилои хадамоти матуботи БМТ, дар ҷараёни вохӯри ҷонибҳо масъалаҳои идома додани барномаи кумаки техникии БОРдар самти пурзур намудани низоми муқовимат ба қонунигардонии даромадҳои бо роҳи ҷиноят бадастоварда ва маблағгузории терроризм, гузаронидани баҳодиҳии хавфи миллӣ дар ин самт, такмил додани қонунгузорӣ, ташкили семинару машваратҳо ва истифода аз барномаҳои пешрафта дар ин ҷода ибрози назар намуданд.

Намояндаи БОР зимни баррасии масъалаҳои мулоқот қайд кард, ки Бонк аз ҳамкориҳои дуҷониба ва судманд бо Бонки миллии Тоҷикистон қаноатманд мебошад ва омодагии ташкилоти худро барои идома додани ҳамкориҳо дар ин самт иброз намуд

Ва дар интиҳои мулоқоти судманд ва ҷамъбасти он тарафҳо ба хулоса омаданд, ки барои ҳаллу фасли масъалаҳои баррасишуда дар ояндаи наздик ҳамкориро идома хоҳанд дод.