Имрӯз дар шаҳри Душанбе ва ноҳияи Ҳисор Анҷумани иқтисодии байналмилалии «Ҳисор-3000» ба кор шурӯъ мекунад.

Бино ба маълумоти Вазорати рушди иқтисод ва савдои ҷумҳурӣ, анҷумани мазкур дар мавзӯи «Нақши соҳибкорӣ дар рушди минтақаҳои Ҷумҳурии Тоҷикистон» ба муносибати ҷашни нахустин солгарди Рӯзи соҳибкор, ки санаи 14 октябр дар кишвар таҷлил мегардад, баргузор мешавад.

«Мақсад аз баргузории чорабинии мазкур мониторинг, арзёбӣ ва ҳамоҳангсозии лоиҳаҳои гуногуни дар минтақаи мазкур татбиқшаванда, баррасии рафти иҷрои нақшаи чорабиниҳои барномаҳои давлатии рушди иҷтимоию иқтисодии ноҳияҳои тобеи ҷумҳурӣ, ҷалби сармоягузориҳо ва муҳокимаи масъалаҳои беҳтар намудани шароит барои рушди соҳибкорӣ дар минтақаи мазкур мебошад», - омадааст дар хабари Вазорат дар ин робита.

Зимнан зикр мегардад, ки ҳамзамон дар доираи анҷумани мазкур гузаронидани намоиши дастовардҳои молҳои саноатӣ, кишоварзӣ ва ҳунарҳои мардумии шаҳру ноҳияҳои тобеи марказ низ пешбинӣ шудааст.