Дар ҷаласаи имрӯзаи палатаи поёнии парлумони кишвар ворид намудани тағйироту илова ба қонун «Дар бораи Буҷети давлатии Тоҷикистон барои соли 2015» маъқул шуморида шуд.

Зимни шарҳи ин масъала ба вакилон муовини аввали вазири молияи ҷумҳурӣ Ҷамшед Каримзода қайд кард, ки дар лоиҳаи тағйирот ба қонуни мазкур озод кардани воридоти 90 номгӯи таҷҳизот ва техникаи тиббӣ барои сохтмони Маркази тиббии «Пойтахт-90» аз пардохти андоз аз арзиши иловашуда (ААИ) ва боҷи гумрукӣ пешбинӣ шудааст.

«Барои сохтмони иншооти зикршуда аз буҷети пойтахт беш аз 500 млн. сомонӣ ва барои харидории таҷҳизоти он - ҳудуди 44 млн. сомонӣ харҷ шуда, ҳаҷми маблағи озодшуда аз пардохти ААИ ва боҷи гумрукӣ 14,6 млн. сомониро ташкил медиҳад», - гуфт ӯ.

Маркази тиббии «Пойтахт-90» дар паҳлӯи Маркази ташхис аз ҳисоби буҷети шаҳри Душанбе сохта шуда истодааст. Марказ аз 38 иншоот, аз ҷумла бемористон бо 650 кат, дармонгоҳ барои қабули 800 беморон дар як баст ва ғайра иборат аст.

Бино ба маълуоти мақомоти шаҳрдории Душанбе, мавриди баҳрабардорӣ қарор додани маркази тиббии «Пойтахт-90» ахири соли равон дар назар аст.