Ширкати истеҳсоли автомобили Iran Khodro Company (IKCO) фурӯш, хизматгузорӣ ва минбаъд истеҳсоли автомобилҳои худро дар Тоҷикистон ба роҳ монданист.

Намояндаи IKCO ба «Азия-Плюс» иттилоъ дод, ки дар ин хусус миёни Гурӯҳи саноатии «Iran Khodro» ва ҶДММ «Гурӯҳи рушди иқтисодӣ ва сармоягузории Тоҷикистон» тавофуқоти пешакӣ ҳосил шудааст.

Санади ниҳоӣ дар ин бора ояндаи наздик дар Теҳрон дар доираи ҷаласаи навбатии Комиссияи байниҳукуматии Эрону Тоҷикистон оид ба ҳамкории тиҷоративу иқтисодӣ ба имзо мерасад.

Ширкати IKCO дар намоишгоҳи байнулмилалии дар шаҳри Душанбе ҷараёндоштаи AgroFood Tajikistan-2015 чор модели автомобилҳои худ - «Runna», «Dena», «Soren» ва «Arisun»-ро ба маърази тамошо гузошт.

Намояндаи ширкат қайд кард, ки дар марҳилаи аввал ифтитоҳи нахустин марказҳои дилерии автомобилҳои IKCO дар назар аст. «Агар ба маҳсулоти мо талаботи кофӣ пайдо шавад, минбаъд мо бо шарикони тоҷикистониамон корхонаи истеҳсоли автомобилҳои IKCOдар ҷумҳуриро таъсис медиҳем», - иброз дошт ӯ.

Қобили зикр аст, ки дар Эрон ба автомобилҳои IKCO талабот зиёд аст. Дар навбати аввал, ин ба дастрасии он вобаста аст. Масалан, нархи модели «Runna» ҳамагӣ 8 ҳазор доллари ИМА ва модели бештар ҷолиби «Dena» ҳудуди 10 ҳазор доллари ИМА аст.