Дар мулоқоти раиси Бонки миллии Тоҷикистон (БМТ) Ҷамшед Нурмаҳмадзода бо ҳайати нави намояндагии Хазинаи байнулмилалии асъор (ХБА) оид ба Тоҷикистон таҳти роҳбарии ҷаноби Пол Росс, ки бо ташрифи нахустин ба Душанбе омадааст, шарҳи умумии дурнамои иқтисодӣ, таҳкими ҳамкориҳои дуҷониба ва масъалаҳои дигари мавриди назари ҷонибҳо баррасӣ шуданд.

Бино ба иттилои хадамоти матбуоти БМТ, дар оғози мулоқот Ҷамшед Нурмаҳмадзода меҳмононро бо вазъи феълии иқтисодӣ ва ичтимойи ҷумҳурӣ шинос намуда, иброз дошт, ки сарфи назар аз ноустувории нархҳо дар бозорҳои ҷаҳонии ашё, хавфҳои молиявӣ ва низоъҳои геосиёсӣ, раванди рушди иқтисодиёти кишвар дар нуҳ моҳи соли равон тамоили нисбатан муътадилро соҳиб гардид.

Ӯ иброз дошт, ки дар ин давра Маҷмӯи маҳсулоти дохилӣ ба 33,6 млрд. сомонӣ баробар шуда, рушди воқеии он 6,4 фоизро ташкил намуд. Сатҳи таваррум дар нуҳ моҳ 3,6 фоизро ташкил дода, нисбат ба ҳамин давраи соли гузашта 2,1 банди фоизӣ кам гардид. Ҳамчунин ҳаҷми сандуқи қарзӣ ва амонатҳои ҷалбшуда дар ташкилотҳои қарзии ҷумҳурӣ назар ба соли гузашта ба андозаи чашмрас афзуданд.

Роҳбари ҳайати намояндагии ХБА оид ба Тоҷикистон ҷаноби Пол Росс зимни мулоқот масъалаҳои рушди геосиёсии минтақавӣ ва таъсири он ба Тоҷикистон, сиёсати пулӣ ва асъорӣ, инкишофи бахши молиявӣ, назорат ва идораи бонкҳоро ба таври муфассал таҳлил ва баррасӣ намуд.

Дар ҷараёни вохӯрӣ ҷонибҳо ҳамчунин дар мавриди таҳияи Барномаи махсуси ХБА оид ба Тоҷикистон ва зарурияти расонидани кӯмаки техникӣ фикру андешаҳои худро иброз доштанд.