Дар шаҳри Қайроққуми вилояти Суғд корхонаи нави коркарди такрории партовгоҳи маъдан - «Шуҳрат-2005»  ба фаъолият шурӯъ намуд.

Аз шуъбаи саноати ҳукумати шаҳри Қайроққум ба «Азия-Плюс» дар ин робита иттилоъ доданд, ки корхонаи нав дар маҳаллаи Чоруқ-Дайрон ҷойгир шуда, партовҳои металли собиқ комбинати металлҳои гаронбаҳои Ленинободро дубора коркард мекунад.

Зимни суханронӣ дар маросими ифтитоҳи корхона раиси шаҳри Қайроққум Матлубахон Амонзода қайд кард, ки корхона дорои худуди 150 гектар замин буда, дар якҷоягӣ бо мутахассисони чинӣ ба азнавкоркарди партовгоҳи маъдан оғоз мекунад.

Раиси шаҳр изҳор дошт, ки дар ин корхона дар марҳилаи аввал то 60 нафар  ҷавонони худи шаҳрак ва баъдан то зиёда аз 100 нафар бо ҷои кори доимӣ ва музди маоши баланд таъмин мешаванд.

Қобили зикр аст, ки тӯли 11 моҳи соли 2015 дар шаҳри Қайроққум 29 корхонаи саноатӣ фаъолият намуда, ба маблағи умумии 1 млрд. 17 млн. 605,4 ҳазор сомонӣ маҳсулот истеҳсол кардаанд, ки дар муқоиса бо ҳамин давраи соли гузашта 131 млн. 430,8 ҳазор сомонӣ зиёдтар аст.