Ширкатҳои роҳи оҳани Тоҷикистону Ӯзбекистон оид ба тахфифҳои тарифӣ ба транзити бору мусофирон тариқи қитъаҳои роҳи оҳани Ӯзбекистон тавофуқ ҳсоил карданд. Дар ин бора хадамоти матбуоти Вазорати нақлиёти Ӯзбекистон хабар медиҳад.

Тибқи созишҳои ҳосилшуда, ҷамъияти саҳҳомии «Ӯзбекистон темир Йӯллари» барои ҳамлу нақли транзитии маҳсулоти нафтӣ, алюминий ва гилхок тариқи қитъаи роҳи оҳани Қарақалпоқистон - Қудуқли ва Келес - Қудуқли соли 2016 ба КВД «Роҳи оҳани Тоҷикистон» дар ҳаҷми 15% тахфиф (камкунии нарх) ҷорӣ мекунад. Ба ҳамлу нақли дигар бору маҳсулот то ахири сол тарифҳо ба андозаи 10% поин бурда шудаанд.

«Ҳамчунин барои кашонидани бору маҳсулоти гуногун аз Ӯзбекистон ба Тоҷикистон низ як қатор тахфифҳои дигар пешбинӣ шудаанд», - гуфта мешавад дар хабар.

Дар ҳамин ҳол, таъкид мекунанд дар Вазорати нақлиёти кишвари ҳамсоя, нишондиҳандаҳо (коэффитсиентҳо)-е, ки тарифҳоро боло мебурданду то ҳол дар қитъаи роҳи оҳани Болдир - Қудуқли мавриди амал қарор доштанд, бекор карда шудаанд.

«Соли 2016 барои ҳамлу нақли мусофирон тавассути ҳамаи хатсайрҳо тахфифҳо дар ҳаҷми 15% пешниҳод шудаанд», - иттилоъ медиҳад Вазорати нақлиёти Тоҷикистон ва қайд мекунад, ки иқдоми мазкур дар муносибатҳо миёни идораҳои роҳи оҳани ду кишвар бори нахуст ба мушоҳида мерасад.