- Бонки миллии Тоҷикистон (БМТ) аз Бонки мардумии Чин 1 млн. юан маблағ дастрас намуд, ки истифодаи он барои эҳтиёҷоти иқтидорҳои истеҳсолии ҷумҳурӣ дар назар аст, - иттилоъ дод зимни нишасти хабарии имрӯза Ҷамшед Нурмаҳмадзода, раиси БМТ.

Ӯ қайд кард, ки моҳи сентябри соли гузашта Бонкҳои марказии кишварҳо дар бораи оғози амалиёти мубодилаи асъор миёни сомонии Тоҷикистон ва юани Чин ё СВОП созишнома ба имзо расониданд.

Ба гуфтаи Нурмаҳмадзода, дар доираи ин созишнома айни замон ба таври озмоиш дар ҳаҷми 1 млн. юан воситаҳо ҷалб шудаанд.

«Дар навбати аввал ин воситаҳо ба бахши истеҳсолӣ равона мегарданд», - гуфт ӯ ва қайд кард, ки ба ташкилотҳои қарзии ҷумҳурӣ дастур дода шудааст, ки барои дастрас кардани асъори чинӣ аз корхонаҳои истеҳсолӣ дархост ҷамъоварӣ кунанд.

Нурмаҳмадзода дар шарҳи ин масъала гуфт, воситаҳои аз Чин дастрасшуда тариқи ташкилотҳои қарзӣ ба корхонаҳое дода мешаванд, ки нияти харидории таҷҳизот аз Чинро доранд.

Ба қавли номбурда, айни замон агентҳо, яъне бонкҳи хизматгузор муайян карда мешаванд, ки ба мубодилаи сомонӣ бо юан машғул хоҳанд шуд. «Минбаъд баъди муайян шудани талаботамон асъори чиниро дар ҳаҷмҳои зарурӣ ҷалб мекунем», - гуфт ӯ.

Раиси БМТ таъкид дошт, ки феълан дар мавриди ивази як асъор бо асъори дигар бо чунин тарз ҳамчунин бо Русия, Туркия ва дигар кишварҳо, ки шарикони тиҷоратии Тоҷикистон мебошанд, гуфтушунидҳо ҷараён доранд.

Нурмаҳмадзода бар ин назар аст, ки бо чунин тарзҳои корбарӣ фишори қурбӣ болои арзи миллии Тоҷикистонро метавон ба таври назаррас коҳиш дод.