Зимни нишасти хабарӣ сардори Сарраёсати молиявӣ-иқтисодии ширкати «Барқи тоҷик» Рустам Маҷидов иттилоъ дод, ки ба аввали соли ҷорӣ қарзи ширкат бидуни назардошти воситаҳои ҷалбшуда барои амалисозии лоиҳаҳои сармоягузорӣ ба 1,5 млрд. сомонӣ расидааст.

«Ҳақиқатан ҳам тайи солҳои ахир ширкати «Барқи тоҷик» дар робита ба таъсири манфии омилҳои беруна ва дохилӣ дар вазъъи мушкили молиявӣ қарор дорад», - изҳор дошт ӯ.

Ба қавли Маҷидов, ба санаи 1 январи соли 2016 қарзи ширкат аз нерӯгоҳи «Сангтӯда-1» - 505 млн. сомонӣ ва «Сангтӯда-2» - 315 млн. сомониро ташкил медиҳад.

Маҷидов қайд кард, ки бо назардошти воситаҳои ҷалбшуда барои амалисозии лоиҳаҳои сармоягузорӣ қарзи ширкат ба зиёда аз 8 млрд. сомонӣ мерасад.

«Дар бораи хусусигардонии ширкат дар робита ба вазъи мушкили молии он айни замон дар ин хусус мо ҳеҷ маълумоте дар даст надорем», - иброз дошт намояндаи ширкат.

Зимнан зикр гардид, ки айни замон ҷараёни азнавташкилдиҳии сохторҳои ширкати «Барқи тоҷик» идома дошта, мувофиқи қарори ҳукумат, он то соли 2018 давом мекунад ва то ин давра масъалаи хусусигардонии ширкат баррасӣ намешавад.