Бо қарори Раёсати Бонки миллии Тоҷикистон (БМТ), Ҷамъияти дорои масъулияти маҳдуди Ташкилоти амонатии қарзии хурд “Алиф-Сармоя” барои анҷом додани амалиёти бонкӣ бо пули миллӣ ва асъори хориҷӣ иҷозатнома гирифт.

Бино ба иттилои хадамоти матбуоти БМТ, акнун ин ташкилот ба ҷалби амонат ва пасандозҳои шахсони воқеӣ ва ҳуқуқӣ, додани қарзи хурд, кушодану пешбурди суратҳитсобҳои бонкӣ, интиқоли маблағҳои пулӣ, амалиёти кассавӣ, амалиёти ҳисоббаробаркунӣ ва мубодилавӣ ва ғайра ҳуқуқ пайдо намуд.

Гуфта мешавад, дар робита ба қарори мазкур дар Феҳристи ташкилотҳои маблағгузории хурд ва Маълумотномаи “Рамзҳои мушаххаси бонкии ташкилотҳои қарзии Ҷумҳурии Тоҷикистон” сабти дахлдор дохил карда мешавад.

Ҳамчунин қайд мешавад, ки бо қарори дигари Раёсати БМТ барои барҳамдиҳии ихтиёрии ФҚХ «Ҳамроз-Тус» розигӣ дода шуда, шаҳодатномаи Фонд бозхонд карда мешавад.

Мақомоти ваколатдори ФҚХ «Ҳамроз-Тус» вазифадор карда шудааст, ки ҳамчун шахси манфиатдор оид ба барҳамдиҳии фонди мазкур ба мақомоти судӣ муроҷиат намояд.

Бино ба маълумоти сомонаи расмии БМТ, айни замон дар низоми бонкии Тоҷикистон 24 ташкилоти қарзии хурд амал мекунанд.