Губернатори вилояти Оренбурги Русия Юрий Берг ахири ҳафтаи сипаришуда бо сафири Тоҷикистон дар Русия Имомуддин Сатторов дидору гуфтушунид карда, зимни мулоқот ҷонибҳо дурнамои ҳамкориҳои иқтисодӣ ва гуманитариро баррасӣ карданд.

Бино ба иттилои дафтари матбуоти ҳукумаи вилояти Оренбург, Юрий Берг изҳор доштааст, ки дар қаламрави вилоят беш аз 4 ҳазор нафар тоҷикони этникӣ кору иқомат дошта, дар ҳаёти иҷтимоиву сиёсӣ ва иқтисодии минтақа фаъолона саҳмгузоранд.

«Дар ҷараёни вохӯрӣ оид ба лоиҳаҳои оянда, аз ҷумла  доир ба масоили табодули донишҷӯён ва амалисозии барномаҳои муштарак барои ҷавонон як қатор тавофуқот ҳосил шуд», - гуфтааст ӯ.

Гуфта мешавад, Имомуддин Сатторов ҳамчунин дар чорабиниҳои бахшида ба ҷашни Наврӯз, ки аз ҷониби ташкилоти ҷамъиятии «Автономияи минтақавии тоҷикии миллӣ-фарҳангӣ» бо дастгирии ҳукумати вилоят барпо шудааст, низ ширкат варзидааст.