Палатаи поёнии парлумони Тоҷикистон имрӯз якдилона ва бидуни баррасӣ тағйироти аз ҷониби ҳукумат пешниҳодшуда ба қонун «Дар бораи иҷозатномадиҳӣ ба баъзе намудҳои фаъолият»-ро дастгирӣ кард.

Зимни суханронӣ назди вакилон доир ба ин масъала раиси Бонки милии Тоҷикистон Ҷамшед Нурмаҳмадзода изҳор намуд, ки тағйироти мазкур операторони терминалҳои пардохтро ба гирифтани иҷозатнома аз Бонки миллӣ уҳдадор мекунад.

Ба гуфтаи раиси БМТ, имрӯз дар ҷумҳурӣ беш аз 3 ҳазор 900 нафар моликони терминалҳои пардохт мебошанд, ки терминалҳоро харида, онҳоро дар нуқтаҳои дастрас барои аҳолӣ гузоштаанд.

Тағйироти қабулшуда ҳамчунин ташкилотҳои қарзиро, ки ба мизоҷон бо усули «бонкинги исломӣ» хизматгузорӣ пешниҳод карданианд, низ аввал ба гирифтани иҷозатнома аз Бонки миллӣ уҳдадор месозад.