Намоишгоҳ-ярмаркаи дуюми маҳсулоти покистонӣ таҳти унвони «Истеҳсоли Покистон» имрӯз дар маҷмааи давлатии «Кохи Борбад» ба кор шурӯъ намуд. Намоишгоҳи нахуст моҳи октябри соли гузашта дар пойтахти Тоҷикистон доир гардида буд.

Намоишгоҳи молу маҳсулоти Покистон аз ҷониби Палатаи савдо ва саноати Тоҷикистон (ПСС ҶТ) дар ҳамкорӣ бо сафорати Покистон дар Тоҷикистон ва ширкати «Промотайм Глобал» созмон дода шудааст.

Ин чорабинӣ дар доираи Ҷашновари тиҷоративу фарҳангӣ дар Душанбе (6-10 апрел) баргузор шуда, дар намоишгоҳ маҳсулоти беш аз 20 ширкати покистонии машғул ба фаъолият дар соҳаи саноати сабук ба маърази тамошо гузошта шудааст.

Зимни суханронӣ дар маросими ифтитоҳи намоишгоҳ, муовини раиси ПСС Тоҷикистон Манзура Рустамова аз ҷумла изҳор дошт, ки хусусияти аслии ин чорабинӣ дар он ифода меёбад, ки дар он натанҳо сатҳи рушди бахшҳои афазлиятноки ҳарду кишвар таҷассум мегардад, балки дурнамои густурдаи ҳамкории мутақобилан судманд низ муайян карда мешавад.

Шоми имрӯз намоишгоҳ ба кори худ хотима мебахшад.