Сарфи назар аз ба мушкилот дучор шудани яке аз бонкҳои низомсози кишвар - «Тоҷиксодиротбонк» дар хизматгузорӣ ба мизоҷон аз оғози сол, эътимод ба низоми бонкии Тоҷикистон устувор арзёбӣ мешавад.

Бонки миллии Тоҷикистон (БМТ) дар ин робита иттилоъ медиҳад, ки дар низоми бонкии ҷумҳурӣ раванди муътадили пасандозгузорӣ идома дорад.

Бино ба иттилои манбаъ, бақияи амонатҳо дар ташкилотҳои қарзии мамлакат дар охири моҳи апрели соли 2016 назар ба ҳамин давраи соли гузашта 22,4% афзуда, 9,2 миллиард сомониро ташкил медиҳад.

«Мувофиқи нишондиҳандаҳои оморӣ фоизи миёнавазни пасандозҳо дар моҳҳои январ-апрели соли ҷорӣ бо пули миллӣ 16,03 фоиз ва пасандозҳо бо асъори хориҷӣ 10,62 фоизи солонаро ташкил менамоянд», - таъкид мешавад дар маълумоти БМТ.

Қобили зикр аст, ки «Тоҷиксодиротбонк» яке аз бонкҳои бузургтарини ҷумҳурӣ шуморида шуда, аз оғози соли равон ба мушкилоти молӣ дучор шуд ва ин ба бонк имкон намедиҳад, ки хизматгузориҳояшро бо мизоҷони худ дар ҳаҷми пурра анҷом диҳад.

Қаблан  иттилоъ дода будем , ки дуюмин бонки тиҷоратии бузург дар Тоҷикистон - «Тоҷиксодиротбонк» баҳри кумак ба Бонки аврупоии таҷдиду рушд (БАТР) муроҷиат кард, то ки буҳрони имконпазири пардохтпазириро пешгирӣ кунад.

«Тоҷиксодиротбонк» ба БАТР харидории 50%-и саҳмияҳои бонкро пешниҳод намуд, ки ҳаҷми сармояи умумии он 80 млн. доллари ИМА-ро ташкил медиҳад.

Бонки миллии Тоҷикистон санаи 18 май бо мақсади беҳтар кардани вазъи молиявии ҶСК «Тоҷиксодиротбонк» ва ҳимояи манфиатҳои пасандоздорон ва қарздеҳон, ба муҳлати то се моҳ дар бонки зикршуда маъмурияти муваққатӣ таъйин намуд.