Дабири кулли Созмони ҷаҳонии сайёҳӣ (СҶС) Толиб Рифоӣ рӯзҳои 9-11 июн бо сафари корӣ ба Тоҷикистон ташриф меорад.

Тавре як манбаъ аз Вазорати корҳои хориҷии ҷумҳурӣ иттилоъ дод, зимни сафар Толиб Рифоӣ бо намояндагони мақомоти расмии ҷумҳурӣ дидору гуфтушунидҳо анҷом дода, бо имконоти сайёҳии Тоҷикистон аз наздик шинос мешавад.

Қобили зикр аст, ки моҳи майи соли 2010 дабири кулли Созмони ҷаҳонии сайёҳӣ бо сафари 5-рӯза аз Тоҷикистон боздид карда, бо сарвари давлат Эмомалӣ Раҳмон, вазири корҳои хориҷии ҷумҳурӣ, раиси Кумитаи ҷавонон, варзиш ва сайёҳӣ ва вазири молияи Тоҷикистон дидору гуфтушунид карда буд.

Зимни мулоқот бо вазири молияи Тоҷикистон Толиб Рифоӣ таъкид дошта буд, ки «аз нигоҳи захираву имконоти сайёҳӣ Тоҷикистон хеле бой аст ва сеяки буҷетро мебояд ба рушди бахши сайёҳӣ равона кард, то ки минбаъд ба рушди иқтисоди кишвар мусоидат намояд».