Сарвазири мамлакат Қоҳир Расулзода бо котиби генералии Созмони умумиҷаҳонии туристӣ (СУТ) Толиб Рифоӣ мулоқот карда, дар вохўрӣ масоили рушди равобити дуҷонибаи Тоҷикистон бо ин созмони ҷаҳонӣ дар соҳаи сайёҳӣ баррасӣ шуд.

Бино ба иттилои АМИТ «Ховар» , Толиб Рифоӣ аз рушди бемайлони соҳаҳои гуногуни Тоҷикистон, хусусан соҳаи сайёҳӣ изҳори хушнудӣ карда, изҳор дошт: «Тоҷикистон дар Созмони умумиҷаҳонии туристӣ   мақоми шоиста ва  ҳамчун кишвари афсонавии сайёҳӣ  дар дили роҳбарияти созмон ҷойгаҳи хоссаи худро дорад»

Тавре таъкид гардид, дар солҳои охир аз ҷониби роҳбарияти сатҳи олии давлату Ҳукумати Ҷумҳурии Тоҷикистон барои беҳбудӣ бахшидани соҳаи сайёҳӣ тадбирҳои шоиста анҷом дода шуда, дар ҳамин замина нишондиҳандаҳои рушди соҳа батадриҷ боло рафтаанд.

Дар мулоқот аз ҷониби Тоҷикистон даъват ба амал оварда шуд, ки ҷиҳати муаррифии бештари имконоти сайёҳӣ дар соли 2017  баргузории як конфронси байналимлалӣ дар соҳаи сайёҳӣ ба нақша гирифта шавад.

Хотиррасон бояд кард, ки соли 2017 дар қаламрави сайёра Соли байналмилалии туризм эълон шудааст.