Нимсолаи аввали соли ҷорӣ аз Тоҷикистон ба хориҷи кишвар ҳудуди 73,5 ҳазор тонна (нимсолаи аввали соли 2015 - каме бештар аз 61,1 ҳазор тонна) алюминий содирот шуд, ки нисбат ба ҳамин давраи соли гузашта 12,3 ҳазор тонна ё худ 20% зиёдтар аст.

Сардори Хадамоти гумруки назди ҳукумати ҶТ Абдуфаттоҳ Ғоиб зимни нишасти хабарии имрӯза дар ин робита изҳор намуд, ки харидори асосии алюминии Тоҷикистон дар соли ҷорӣ Туркия дониста мешавад, ки ба ҳиссаи ин кишвар беш аз 70,5% (беш аз 52,3  ҳазор тонна) аз ҳаҷми умумии содирот рост меояд.

Тибқи маълумоти Хадамоти гумрук, дар ин давра ҳамчунин алюминии Тоҷикистон ба Тайван  дар ҳаҷми беш аз 16,5 ҳазор тонна, Эрон - зиёда аз 4,1 ҳазор тонна, ҷазираҳои Вирҷиния - 288,2 тонна, Ӯзбекистон - 133 тонна ва Покистон - наздики 30 тонна интиқол дода шудааст.

Қобили зикр аст, ки соли гузашта Тоҷикистон ба хориҷи кишвар қариб 131 ҳазор тонна алюминий содирот кард, ки дар муқоиса бо нишондиҳандаи соли 2014 ба миқдори 6 ҳазор тонна бештар мебошад.