Баъди аз аввали моҳи июли соли равон дар Қазоқистон боло рафтани нархи гази моеъ, арзиши он дар нуқтаҳои фурӯши сӯзишвории шаҳри Душанбе 16% афзуд.

Айни замон нархи 1 литр гази моеъ дар нуқтаҳои фурӯши сӯзишвории пойтахт 3,2 сомониро ташкил медиҳад ва ин ҳам дар ҳолест, ки аввали моҳи июл арзиши  ин навъи сӯзишворӣ ба 2,8 сомонӣ баробар буд.

Қобили зикр аст, ки Қазоқистон яке аз кишварҳои асосии таъминкунандаи бозори Тоҷикистон бо гази моеъ маҳсуб меёбад. Бино ба маълумоти Хадамоти зиддиинҳисорӣ, ҳудуди 70% аз ҳаҷми умумии гази моеъи воридшуда ба Тоҷикистон дар нимсолаи аввал ба Қазоқистон рост меояд.

Дар ҳамин ҳол, мувофиқи маълумоти Вазорати рушди иқтисод ва савдои ҷумҳурӣ, айни замон беш аз 60%-и воситаҳои нақлиёти Тоҷикистон ба сифати сӯзишворӣ аз гази моеъ истифода мекунанд.

Қаблан Хадамоти зиддиинҳисории назди ҳукумати Тоҷикистон болоравии арзиши гази моеъ дар нуқтаҳои фурӯшро дар пайи афзоши нархи ин навъи сӯзишворӣ дар Қазоқистон аз эҳтимол дур надониста буд. Дар ҳамин ҳол, дар Хадамот болоравии босуръати нархҳоро интизорӣ надоштанд, зеро ширкатҳои воридкунандаи гази моеъ ба Тоҷикистон аллакай ба харидории ин навъи сӯзишворӣ аз Русия бештар таваҷҷуҳ зоҳир мекунанд.

Ёдрас мекунем, ки дар робита ба афзоиши ҳаҷми содироти гази моеъ ба хориҷи кишвар, аз 1 июли соли равон Қазоқистон  нархи онро беш аз 2 баробар  боло бурд.

Бино ба  иттилои  хадамоти матбуоти Вазорати энергетикаи ин кишвар, дар чанде аз минтақаҳои кишвар камбуди гази моеъ ба вуҷуд омада, аз ин рӯ, бо мақсади таъмини устувори бозори дохилӣ бо ин навъи сӯзишворӣ, арзиши яклухти он аз 11033 танга (32$) то ба 23106 танга (67$) боло бурда шуд.