Дар ҳошияи сафари корӣ ба вилояти Хатлон Президенти Ҷумҳурии Тоҷикистон Эмомалӣ Раҳмон дар кӯчаи Рӯдакии шаҳри Сарбанд ба фаъолияти сардхонаи ҶДММ «Субҳи Сарбанд» расман оғоз бахшид.

Бино ба иттилои хадамоти матбуоти сарвари давлат, дар ин сардхона имкони нигоҳдории то 1000 тонна меваю сабзавот мавҷуд буда, аз ҷониби Ҷамъияти дорои масъулияташ маҳдуди «Субҳи Сарбанд» бунёд гардидааст.

Гуфта мешавад, сардхона бо технологияи муосир ба маблағи 2 миллиону 645 ҳазор сомонӣ муҷаҳҳаз гардида, дар он нигоҳдории маҳсулоти тару тозаи кишоварзӣ тибқи стандартҳои байналмилалӣ ба роҳ монда шудааст ва баробари ба истифода додани он 25 нафар сокинони шаҳри Сарбанд бо ҷойи кор таъмин карда шудаанд.

Зикр мегардад, ки дар шафати  сардхона коргоҳи истеҳсоли қуттиҳои пластикӣ мавриди истифода қарор дода шуд, ки дар як шабонарӯз то 1500 дона қуттӣ истеҳсол мекунад. Чунин қуттиҳои пластики қаблан аз хориҷи мамлакат бо нархи гарон ворид карда мешуд. Минбаъд хоҷагидорон имкон доранд бо нархи дастрас аз ин коргоҳ қуттиҳои пластикиро харидорӣ намоянд.