Ҳукумати Тоҷикистон дастур додааст, ки қарзҳо аз андоз, ҳамчунин ҷаримаву фоизи онҳо, ки ҳаҷмашон ҳамагӣ беш аз 14,2 млн. сомонӣ (зиёда аз 1,5 млн. доллар)-ро ташкил медиҳад, аз эътибор соқит карда шавад.

Қарори ҳукумат “Дар бораи аз эътибор соқит кардани қарзҳои пардохташон ғайриимкон аз андоз, ҷаримаву фоизи онҳо” санаи 1 марти соли равон имзо шудааст.

Қарзҳо аз андоз, ҳамчунин ҷаримаву фоизи онҳо, ки то 1 январи соли 2011 ба вуҷуд омадаанд, аз эътибор соқит дониста мешаванд.

Аз ҷумла, дастур дода шудааст, ки андозҳо ба маблағи умуии беш аз 6,1 млн. сомонӣ ва ҷаримаву фоизҳо - дар ҳаҷми зиёда аз 8,1 млн. сомонӣ беэътибор дониста шаванд.

Ба мақомоти андози ҷойи қайди андозсупорандагон ва ташкилотҳое, ки қарзҳояшон бекор мешаванд, супориш дода шудааст, ки дар ин хусус тағйироти дахлдор ворид созанд.

Ба кӣ қарзҳои андоз бахшида мешаванд

Ба рӯйхати андозсупорандагоне, ки қарзҳояшон аз андоз, ҷарима ва фоиз аз онҳо бахшида мешаванд, 11 ширкат ва 3 соҳибкори хусусӣ шомил шудаанд:

- МД «Истифодабарии манзил» (ш. Хуҷанд);

- ҶСК «Филиз» (ш. Исфара);

-  ҶСК «Тамокубарории Душанбе» (ш. Душанбе);

- КВ «Раёсати таъмиру сохтмон» (ноҳияи Исмоили Сомонӣ);

- ҶДММ «Фароиз»;

- ҶДММ «Нурафшон»;

- ҶДММ «Сабр»;

- ҶДММ «Ал-Бухорӣ»;

- ҶДММ «Ифтихор 2009»;

- ҶДММ «Таврида»;

- Соҳибкори хусусӣ Абдулазиз Абдулмақсуд;

- Соҳибкори хусусӣ Муллобоев Нарзуллоҷон Насриддннович;

- Соҳибкори хусусӣ Ҳоҷибоев Абдуҷалол.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.