Пас аз баргузор намудани ташхиси давлатии лоиҳаи “Сохтмони айвончаҳо (галереяҳо)-и муҳофизат аз тарма дар роҳи автомобилгарди Душанбе-Чанок” паймонкор ба амалисозии он шурӯъ мекунад, хабар доданд ба “Азия-Плюс” аз Вазорати нақлиёти Тоҷикистон.

Дар Вазорат қайд карданд, ки восита барои амалисозии ин қисмати лоиҳаро дар ҳаҷми 5 млн. доллар ҳукумати Покистон ба таври кумаки бебозгашт ҷудо мекунад.

Паймонкори кулли лоиҳа ширкати China Road-и Чин интихоб шудааст, ки Вазорати нақлиёт аввали сол бо он созишномаи дахлдор ба имзо расонидааст.

“Лоиҳаҳои корӣ барои ҳар кадоме аз қитъаҳо ҷудогона таҳия ва ба ташхиси давлатӣ пешниҳод шудааст. Пас аз дарёфти хулосаи мусбат паймонкор ба корҳои сохтмон оғоз мекунад”, - таъкид дошт манбаъ.

Тибқи маълумоти Вазорати нақлиёт, дар доираи лоиҳаи “Сохтмони айвончаҳои муҳофизат аз тарма дар роҳи автомобилгарди Душанбе-Чанок” бунёди 55 адад айвончаҳои муҳофизат аз тарма бо масофаи умумии тақрибан 5665 метр пешбинӣ шудааст.

Барои анҷоми корҳои пешбинишуда ба сурати умум тақрибан 51,5 млн. доллар маблағ зарур аст.

Айни замон дар роҳи автомобилгарди Душанбе-Чанок 24 адад чунин галереяҳо сохта шудааст. Ин иншоот асосан аз ҷониби ширкати China Road соли 2013 ҳангоми таъмиру навсозии роҳ бунёд шудааст.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.