Ҳукумати Тоҷикистон барои амалисозии лоиҳаҳои давлатии сармоягузорӣ дар се соли оянда қариб 930 млн. доллар қарзҳои хориҷиро аз худ карданист.

Дар доираи Барномаи қарзҳои берунии хориҷӣ соли 2020 аз худ кардани 228,14 млн., соли 2021 – 336,48 млн. ва соли 2022 – 365,31 млн. доллар маблағҳо ба нақша гирифта шудааст.

Мувофиқи барнома, соли равон аз худ кардани қарзҳо дар ҳаҷми 189,8 млн. доллар пешбинӣ шудааст.

Айни замон Барнома аз 60 лоиҳаи қарзии амалкунанда ва 31 созишномаи қарзӣ иборат аст, ки дар марҳилаи лоиҳасозӣ қарор доранд. Маблағи умумии қарзҳои азхудшуда тибқи ин Барнома то 1-уми январи соли равон 1 млн. 18 млн. долларро ташкил додааст.

Қобили зикр аст, ки қарзгир дар ин ҳолат ҳукумат буда, баргардонидани қарз бар дӯши субъектҳои хоҷагидории ҷумҳурӣ вогузор мешавад.

Ёдрас мекунем, ки то 1-уми июли соли 2019 ҳаҷми умумии қарзи хориҷии Тоҷикистон 2 млрд. 894,56 млн. долларро ташкил додааст, ки ба 35,9%-и Маҷмӯи маҳсулоти дохилии кишвар баробар аст.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.