Мақомоти гумруки Тоҷикистону Ӯзбекистон оид ба молу маҳсулот ва воситаҳои нақлиёт, ки тариқи сарҳадоти ду кишвар ҳамлу нақл мешавад, пешакӣ табодули маълумот мекунанд.

Ҳукумати Тоҷикистон дастур додааст, ки санади таҳияшуда байни мақомоти гумруки кишварҳо маъқул дониста шавад.

Зарурати ба имзо расидани чунин қарордод “беҳбуди самаранокии назорати гумрукии мол ва воситаҳои нақлиёт”, ки тариқи сарҳад мегузаранд, маънидод мешавад.

Ҳамчунин дар назар аст, ки санади мазкур ба фароҳам сохтани шароити мусоид барои савдо байни кишварҳо мусоидат мекунад.

“Ҷонибҳо доимо зимни анҷоми расмиёти гумрукии мол ва воситаҳои нақлиёт, ки аз қаламрави ҳамсоякишвар ворид мешавад, агар нуқтаи таъинот ё хатсайри транзит дар дигар ҷониб воқеъ бошад, на камтар аз ду соат то убури сарҳади гумрукӣ табодули маълумот мекунанд”, - қайд мешавад дар лоиҳаи санад.

Гуфта мешавад, маълумоти дастрасшуда махфӣ буда, танҳо баҳри иҷрои мақсадҳои мақомоти гумрук истифода мешавад.

Барои дигар мақсадҳо маълумот танҳо бо розигии хаттии Тарафе, ки онро пешниҳод кардааст, истифода мешавад.

Қобили зикр аст, ки тайи се соли охир ҳаҷми муомилоти мол байни Тоҷикистону Ӯзбекистон босуръат боло рафта, давоми нуҳ моҳи соли равон қариб 295 млн. долларро ташкил додааст, ки нисбат ба ҳамин давраи соли гузашта 23% бештар аст.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.