Байни мақомоти дахлдори Тоҷикистон ва Чин дар реҷаи онлайн ҷаласаи Гурӯҳи кории механизми муштарак дар робита ба таъмини интиқоли бемамонияти бор тавассути гузаргоҳи марзии “Кулма - Қаросу”, инчунин пешгирӣ ва назорати эпидемия дар сарҳад доир гардид.

Бино ба иттилои дафтари матбуоти Вазорати нақлиёти ҶТ, дар ҷаласаи гурӯҳи корӣ ҳайати Тоҷикистонро вазири нақлиёти ҷумҳурӣ Азим Иброҳим ва ҷониби Чинро муовини якуми раиси ноҳияи Мухтори Синзян Уйғур – Чжан Чунлин роҳбарӣ намуданд.

Гуфта мешавад, дар ҷаласа инчунин намояндагони Вазоратҳои нақлиёт, тандурустӣ ва ҳифзи иҷтимоии аҳолӣ, корҳои дохилӣ, корҳои хориҷӣ, Қушунҳои сарҳадии КДАМ, Кумитаи бехатарии озуқаворӣ, Хадамоти гумрук ва Хадамоти давлатии назорат ва танзим дар соҳаи нақлиёт низ ҳузур доштанд.

Сурат: Вазорати нақлиёти ҶТ

Дар натиҷаи муҳокимаи масъалаҳои ҷойдошта, ҷонибҳо ба мувофиқа  расиданд, ки барои ҳамлу нақли мунтазам ва самарабахш тавассути гузаргоҳи “Кулма - Қаросу” чораҳои заруриро роҳандозӣ  хоҳанд кард.

Аз ҷумла, пешниҳодҳои ҷониби Тоҷикистон ҷиҳати паст намудани арзиши боркунию борфарорӣ дар гузаргоҳ, бозпас гирифтани контейнерҳои холӣ ва истифодабарии ядак ва нимядак аз ҷониби ҳайати Чин пазируфта шуд.

Қобили зикр аст, ки постгоҳи сарҳадии “Кулма” дар марзи байни Тоҷикистону Чин аз аввали моҳи октябри соли гузашта баста боқӣ мемонад.

Зимни нишасти матбуотии рӯзи 18 феврали соли равон муовини сардори Хадамоти гумруки Тоҷикистон Азим Турсунзода изҳор дошт, ки дар ин гузаргоҳ зиёда аз 260 адад мошинҳои бузургҳаҷми боркаш (фураҳо) бо молу колои тоҷирони тоҷик ҷамъ шудаанд.

Пеш аз ин вазири корҳои хориҷии Тоҷикистон Сироҷиддин Муҳриддин зимни вохӯрӣ бо рӯзноманигорон дар ин робита изҳори умедворӣ намуд, ки ҷониби Чин гузаргоҳи “Қулма”-ро то охири моҳи феврал боз мекунад.

Чин ба сегонаи шарикони асосии савдои ҷумҳурӣ шомил буда, аз рӯйи ҳаҷми гардиши молу маҳсулот бо Тоҷикистон пас аз Русия ва Қазоқистон зинаи сеюмро ишғол мекунад.

Соли 2020 аз Чин ба Тоҷикистон ба маблағи ҳудуди 440 млн доллар молу коло ворид шудааст. Дар муқоиса бо як соли пешин, соли 2020 ҳаҷми гардиши молу маҳсулот байни Тоҷикистону Чин ба андозаи қариб 20% поин рафт.

Тоҷикистон аз Чин асосан маҳсулоти ғайриозуқа: масолеҳи сохтмон, қисмҳои эҳтиётии автомашинаҳо, сарулибос, техникаву таҷҳизоти гуногун ва дигар чизҳо ворид мекунад. Баъзе маҳсулоти ғизоӣ низ оварда мешавад.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.