Ноиби президенти Бонки ҷаҳонӣ оид ба Аврупо ва Осиёи Марказӣ Анна Берде изҳор дошт, ки ин ниҳод ба идомаи дастгирии талошҳои Тоҷикистон дар истифодаи манбаъҳои бештар тоза ва барқароршавандаи энергия омода аст.

Аз рӯйи натиҷаҳои сафар ба ҷумҳурӣ ӯ гуфт, Тоҷикистон дар истеҳсол ва содироти энергияи тозаи барқароршаванда имконоти назаррас дорад.

Сармоягузории ҷории Бонки ҷаҳонӣ ба бахши энергетикаи Тоҷикистон ҳудуди 500 млн долларро ташкил медиҳад.

Ба қавли номбурда, Бонки ҷаҳонӣ ба талошҳо дар таҳкими устувории соҳаи энергетика, бартараф намудани реҷаи маҳдуди мавсимии истифодаи барқ, таъмини боэътимоди дастрасӣ ба барқ ва густариши ба содирот бештар рӯ овардани соҳа мусоидат менамояд.

Қобили зикр аст, ки имконоти гидроэнергетикии Тоҷикистон 527 млрд кВт/соат дар як сол арзёбӣ шуда, айни замон ҳамагӣ 5%-и он истифода бурда мешавад.

Аз рӯйи ин нишондиҳанда Тоҷикистон пас аз Чину Русия, ИМА, Бразилия, Зайир, Ҳиндустон ва Канада зинаи 8-умро ишғол мекунад.

Аз лиҳози имконоти содиротӣ (497 млрд кВт/соат дар як сол) Тоҷикистон пас аз Русия ва Зайир дар мақоми сеюм дар ҷаҳон қарор дорад.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.