Дар Индекс (шохис)-и гузариши энергетикӣ дар соли 2024, ки ҳамасола аз ҷониби Форуми ҷаҳонии иқтисодӣ (World Economic Forum, WEF) нашр мешавад, Тоҷикистон миёни кишварҳои Осиёи Маркази дар мақоми аввал қарор дорад. Байни 120 кишвар Тоҷикистон бо касби 53,6 балл дар зинаи 71-ум ҷойгир шудааст.

Ин нишондиҳанда ба Тоҷикистон имкон додааст, ки дар зинаҳои пештар аз Қазоқистон (мақоми 98-ум - 50,1 балл) ва Қирғизистон (мақоми 80-ум - 52,7 балл) қарор гирад. Ӯзбекистон ва Туркманистон ба радабандӣ шомил нашудаанд.

Индекси гузариши энергетикӣ (Energy Transition Index, ETI) - арзёбии маҷмӯавии низомҳои энергетикии кишварҳои ҷаҳон мебошад, ки ба ду нишондиҳандаи калидӣ асос ёфтааст: самаранокии низоми энергетикӣ (60%) ва омодагӣ ҷиҳати гузариш ба модели устувор (40%). Байни омилҳои таъсиррасон ба балли умумӣ дастрасӣ ба энергия, устуворӣ, сатҳи навгониҳо (инноватсияҳо), ҳолати зерсохтор, инчунин дастгирии сиёсӣ ва фаъолмандии сармоягузорӣ дар соҳа ба инобат гирифта мешаванд.

Пешсафони радабандии ҷаҳонӣ маъмулан кишварҳои Аврупои Шимолӣ мебошанд: Шветсия - 78,4 балл, зинаи 1-ум, Дания - 75,2 балл, зинаи 2-юм ва Финландия - 74,5 балл, зинаи 3-юм. Нишондиҳандаи миёнаи ҷаҳонӣ 56,5 баллро ташкил додааст, ки каме аз натиҷаи Тоҷикистон балндтар аст.

Байни давлатҳои ИДМ ва минтақаи Хазар (Каспий) дар соли 2024 Озарбойҷон бо 60,3 балл ва мақоми 38-ум пешсаф мебошад.

Дар Telegram, Facebook ва Instagram бо мо бимонед.