Дар корҳои сохтмону насби Нерӯгоҳи барқи обии “Роғун” дар Тоҷикистон ба истифодаи роботи махсус барои кафшергарӣ оғоз намуданд.

Ба иттилои шабакаи Телеграми Вазорати энергетика ва захираҳои оби ҷумҳурӣ, татбиқи технологияҳои муосир, аз ҷумла истифодаи роботи кафшергар, имкон медиҳад, ки раванди иҷрои корҳои муҳандисиву сохтмонӣ бо суръат, дақиқ ва сатҳи баландтари бехатарӣ амалӣ гарданд.

Ба ақидаи мутахассисон, истифодаи чунин таҷҳизоти инноватсионӣ қадами муҳиме дар самти ворид намудани таҷрибаи ҷаҳонӣ ба сохтмони бузургтарин иншооти энергетикии минтақа ба ҳисоб меравад.

Робот-кафшергар ба иҷрои маҷмӯи васеи корҳо оид ба фулузот (металл) қодир буда, мустаҳкамӣ ва дақиқии пайвастҳоро таъмин мекунад. Ғайр аз ин, истифодаи он хавфу хатарҳо барои коргаронро кам мекунад, зеро дар қитъаҳои хатарашон бештар аз техника истифода мешавад.

Дар Вазорати энергетика зикр мекунанд, ки ин ба сиёсати таҷдиди равандҳои сохтмон дар НБО “Роғун” ва ҷорисозии технологияҳо, ки дар иншооти бузурги ҷаҳон истифода мешаванд, мутобиқ аст.

Сарфи назар аз ҷорисозии таҷҳизоти инноватсионӣ дар НБО "Роғун", талабот ба мутахассисони ҳирфаӣ боқӣ мемонад. То моҳи августи соли 2025 шуъбаи кадрҳои ҶСК “НБО Роғун” ба пешниҳоди ҷойҳои корӣ дар сохттмон идома медиҳад.

Дар Telegram, Facebook ва Instagram бо мо бимонед.